Dapi las davosas attaccas da terrur a Londra sundel en contact cugl EDA, resp. MI5 a London. Bugen laschel vegnir tier a Vus ils links che jeu hai survegniu. Il prighel exista, sa denton entras sedepurtar adequat vegnir minimaus. Quei pretenda che mintgina e mintgin pren serius la situaziun ed agescha era leusuenter:
Nus planisein la jamna aschia che nus savein evitar ils mieds da transport ella rush hour, tier tuttas attracziuns vein nus gia empustau ils bigliets aschia che nus savein entrar fetg spert. Nus vegnin ad evitar zonas da risico. Nossa casa secatta en in liug ruasseivel cun pauca glieud, naven dil center e buc en in quartier cun migrants. Il spazi ei fetg aviarts. Sin fundament dalla situaziun el liug selubin nus da far midadas vid il program. Las gruppas vegnin a tener duront ils viadis schi pintgas sco pusseivel.
Gia tier ina davosa viseta a London, era gest suenter in attentat, hai jeu viu las mesiras da segirtad che vegnan pridas. La presenza da forzas da segirtad ei enorma, quei che ha era per nus consequenzas: ins vegn savens controllaus, cunzun sch’ins ha tastgas ni sacados cun ins. Perquei supplichein nus tuts da schar a casa sacados e tastgas pli grondas.
Pils geniturs endrizzein nus puspei ina hotline – sco mintga onn. La numera secloma 079 729 73 72. Davos quella stat nies president dalla fundaziun ser Roland Just. Quella numera ei il contact ufficial da Vus geniturs cun nus el camp. La numera vegn era publicada sut campcadi.ch.
Sedepurtar participontAs:
Era mintgina e mintgin sa segidar d’evitar situaziuns da prighel. Per quei lein nus che tuts:
- stettien adina ensemen ella gruppa cu ei vegn giavischau
- suondien ils avis dils menaders/dallas menadras
- seigien serius, fetschien buca da tup, provocheschien buca persunas
- tenien aviert ils egls duront ils viadis e sin via
- merien per il beinstar dalla gruppa/dil camp
- prendien buca sacados (prighel d’emblidar, segirtad, controllas)
- eviteschien grondas gruppas da persunas
Davart igl ulteriur agir concret en cass da terrur informein nus ils participonts a Londra gest tier l’arrivada. (ir en segirtad, serimnar)
Agir dils geniturs:
En in marcau cun varga 7 milliuns habitonts capeta dapli che tier nus cun nos paucs mellis. Entras las medias d’ozildi eis ei tgunsch pusseivel che Vus geniturs vegnis sissu pli spert che nus davart las caussas che capetan. Per damondas en connex cun eventuals accidents supplichein nus Vus instantamein da contactar nossa hotline e buca las persunas el camp. Cheutras impedis Vus buca nossa lavur, cunzun sche nus stuessen puder tier zatgi. Sche nossa gruppa ei pertuccada dad in incident vegnin nos immediat ad informar ser Roland Just.
La situaziun momentana sin quest mund pretenda respect, denton negina tema.
Links:
